შინაგან საქმეთა სამინისტროს სასაზღვრო პოლიციის სპეციალური დანიშნულების ავიაციის დეპარტემენტის მფრინავებმა და ტექნიკურმა პერსონალმა სამაშველო ვერტმფრენის “Augusta Bell 206 B Jetranger III type helicopter” მართვის და მომსახურების ტრენინგები, ლატვიის რესპუბლიკაში, ლატვიის რესპუბლიკის სახელმწიფო საზღვრის დაცვის უწყებაში გაიარეს.
ლატვიის რესპუბლიკის სახელმწიფო საზღვრის დაცვის დახმარებით და მიგრაციის პოლიტიკის განვითარების საერთაშორისო ცენტრის (ICMPD) ფინანსური მხარდაჭერით მიმდინარეობს პროექტი „საქართველოს სასაზღვრო პოლიციის შესაძლებლობების გაძლიერება მწვანე და საზვაო საზღვრის დაკვირვებისთვის“. აღნიშნული პროექტის ფარგლებში საქართველოს სასაზღვრო პოლიციისთვის ევროპული ტიპის სამაშველო ვერტმფრენის “Augusta Bell 206 B Jetranger III type helicopter” გადმოეცემა.
ტრენინგი მოიცავდა, როგორც თეორიულ, ასევე პრაქტიკულ მეცადინეობებს. მონაწილეებმა ვერტმფრენის მართვისა და მომსახურების შესწავლასთან ერთად, ასევე გაიარეს მოკლე კურსი საზღვრის ინტეგრირებული მართვის და ადამიანის უფლებების ნაწილში.
ტრენინგის დასრულების შემდეგ სასაზღვრო პოლიციის სპეციალური დანიშნულების ავიაციის დეპარტემენტის მფრინავებს და ტექნიკურ პერსონალს შესაბამისი სერტიფიკატები გადაეცათ.
