ორმხრივი და რეგიონული თანამშრომლობა

სასაზღვრო პოლიციის საერთაშორისო თანამშრომლობა ემყარება საერთაშორისო სამართლის საყოველთაოდ აღიარებულ პრინციპებსა და საქართველოს, უცხო ქვეყნებისა და საერთაშორისო ორგანიზაციების საერთო ინტერესებს სასაზღვრო სფეროში საქმიანობის კოორდინაციის, თანამშრომლობის გაღრმავებისა და სასაზღვრო საკითხების გადაწყვეტის მიზნით. საერთაშორისო თანამშრომლობის მიზანია, კომპეტენციის ფარგლებში, საუკეთესო საერთაშორისო პრაქტიკის მოძიება, მისი დამუშავება და შემდგომში მიღებული ინფორმაციისა და გამოცდილების საფუძველზე სასაზღვრო პოლიციის განვითარების ხელშემწყობი პროცესების ინიცირება.

საერთაშორისო თანამშრომლობა ხორციელდება ორმხრივ და მრავალმხრივ ფორმატებში, ამავდროულად სასაზღვრო პოლიცია თანამშრომლობს საერთაშორისო ორგანიზაციებთან.

სასაზღვრო უსაფრთხოების განმტკიცების მიზნით, საერთაშორისო თანამშრომლობის ერთ-ერთ უმნიშვნელოვანესს მიმართულებას წარმოადგენს მეზობელი ქვეყნების - თურქეთის რესპუბლიკის, აზერბაიჯანის რესპუბლიკის და სომხეთის რესპუბლიკის შესაბამის უწყებებთან თანამშრომლობა. გამონაკლისს რუსეთის ფედერაცია წარმოადგენს, რადგან 2008 წლის მოვლენების შემდეგ შეჩერებულია დიპლომატიური ურთიერთობები.

საქართველოს სასაზღვრო პოლიციასა და თურქეთის რესპუბლიკის გენერალურ შტაბს შორის ყოველწლიური ორმხრივი სამხედრო თანამშრომლობის გეგმების ფარგლებში ხდება საპატრულო გემების პერსონალის გაცვლა; იმართება საპატრულო გემების ორმხრივი ვიზიტები და სამხედრო დიალოგის შეხვედრები; საქართველოსა და თურქეთის რესპუბლიკის სასაზღვრო ქვედანაყოფები ერთობლივ წვრთნებში მონაწილეობენ; სასაზღვრო პოლიციის მოსამსახურეები ყოველწლიურად გადიან სწავლებას და იმაღლებენ კვალიფიკაციას თურქეთის სასწავლო დაწესებულებებში. სასაზღვრო პოლიცია მჭიდრო თანამშრომლობს ლატვიის, ლიეტუვის, პოლონეთის, მოლდოვის  სასაზღვრო უწყებებთან და გერმანიის ფედერალურ პოლიციასთან.

რეგიონული უსაფრთხოების უზრუნველყოფის მიზნით, სასაზღვრო პოლიცია აქტიურად თანამშრომლობს შავი ზღვის რეგიონის ქვეყნებთან, როგორც ორმხრივ, ასევე მრავალმხრივ ფორმატში (თურქეთი, რუმინეთი, უკრაინა, ბულგარეთი).

მრავალმხრივ ფორმატში თანამშრომლობა ხორციელდება „შავი ზღვის სამხედრო-საზღვაო თანამშრომლობის ჯგუფის დაარსების შესახებ“ (2001 წ.) და „შავი ზღვისპირა ქვეყნების სასაზღვრო/სანაპირო დაცვის უწყებებს შორის თანამშრომლობის შესახებ“ (2006 წ.) შეთანხმებების საფუძველზე.

აღსანიშნავია თანამშრომლობა ევროკავშირის პროექტის „აღმოსავლეთ პარტნიორობა“ ფარგლებში, რომლის მიზანია ურთიერთობების გაღრმავება და გაძლიერება ევროკავშირს, მის წევრ სახელმწიფოებს და აზერბაიჯანს, ბელარუსს, მოლდოვას, საქართველოს, სომხეთსა და უკრაინას შორის. სასაზღვრო პოლიცია ასევე აქტიურად თანამშრომლობს ევროპის უშიშროებისა და თანამშრომლობის ორგანიზაციასთან. სასაზღვრო პოლიციის პერსონალი პროფესიული განვითარების კუთხით, მნიშვნელოვანია აღინიშნოს ბრიტანეთის საელჩოსთან და სამხედრო ატაშეს ოფისთან, ასევე საბერძნეთს ეროვნული სამხედრო გენერალური შტაბთან თანამშრომლობა.