საქართველოს შინაგან საქმეთა სამინისტროს სასაზღვრო პოლიციის სანაპირო დაცვის დეპარტამენტის სადარაჯო ხომალდმა „დიოსკურიამ” (P25), უკრაინაში, ქ.ოდესაში, უკრაინის დამოუკიდებლობის 30-ე წლისთავისადმი მიძღვნილ საზღვაო აღლუმში მიიღო მონაწილეობა. ღონისძიებას სანაპირო დაცვის დეპარტამენტის დირექტორის მოადგილე, პირველი რანგის კაპიტანი გიორგი ნაყოფია ესწრებოდა.
საზღვაო აღლუმი უკრაინის სამხედრო-საზღვაო ძალების მეთაურობით ჩატარდა. ღონისძიებაში, ქართველებთან ერთად, უკრაინის, იტალიის, თურქეთის, რუმინეთისა და ბულგარეთის საზღვაო ძალების ხომალდები მონაწილეობდნენ.
აღლუმზე განხორციელდა უკრაინის საზღვაო ავიაციისა და საჰაერო ძალების შესაძლებლობების დემონსტრირება და პარტნიორი ქვეყნების ხომალდების და კატარღების საზეიმო - საჩვენებელი ჩავლა, ასევე გაიმართა უკრაინის სამხედრო-საზღვაო ძალების შეიარაღების და საბრძოლო ტექნიკის გამოფენა.
