საზღვაო ოპერაციების ერთობლივი მართვის ცენტრს საქართველოში აშშ-ის ელჩი კელი დეგნანი ესტუმრა. ელჩს შინაგან საქმეთა სამინისტროს სასაზღვრო პოლიციის უფროსის პირველმა მოადგილემ, პოლკოვნიკმა გოჩა ჯანჯღავამ უმასპინძლა.

სამუშაო შეხვედრას სასაზღვრო პოლიციის სანაპირო დაცვის დეპარტამენტის დირექტორი - I რანგის კაპიტანი რამაზ პაპიძე, საზღვაო ოპერაციების ერთობლივი მართვის ცენტრის უფროსი - II რანგის კაპიტანი შოთა მიროტაძე და აშშ-ის ექსპორტის კონტროლისა და საზღვრის უსაფრთხოების (EXBS) პროგრამის ხელმძღვანელი როზი პეტროვი ესწრებოდნენ.

შეხვედრაზე პოლკოვნიკმა გოჩა ჯანჯღავამ ელჩს სტუმრობისა და წარმატებული თანამშრომლობისთვის მადლობა გადაუხადა. მხარეებმა ერთობლივ პროექტებზე, შავი ზღვის უსაფრთხოების საკითხებსა და საზღვაო ოპერაციების ერთობლივი მართვის ცენტრის პროგრესზე ისაუბრეს. JMOC-ის უფროსმა აშშ-ის დელეგაციის წევრებს ცენტრის საქმიანობის, მიღწეული შედეგებისა და განვითარების გეგმების შესახებ დეტალური პრეზენტაცია წარუდგინა. აშშ-ის ელჩმა ყურადღება სასაზღვრო პოლიციასთან ნაყოფიერ თანამშრომლობაზე გაამახვილა და აღნიშნა, რომ ამაყობს მიღწეული პროგრესით.

საზღვაო ოპერაციების ერთობლივი მართვის ცენტრი აშშ-ის ექსპორტის კონტროლისა და საზღვრის უსაფრთხოების პროგრამის (EXBS) დაფინანსებით შეიქმნა. მასში სხვადასხვა სახელმწიფო უწყებაა გაერთიანებული, რომელთა კოორდინაციასაც შინაგან საქმეთა სამინისტრო ახდენს.